Steur de webmeister een mailtje
Loeëte te koup veur de BBB loeëterie
Gelökkig
Niejaor !!

De Arcense kunstenaer Ruud van der Beele haet veur de kômmende vastelaovend 'd'n Opstaeker 2013' ontworpe. Names de Keieschiéters oét Arcen had vors Frans Cup dit jaor de iër om 'nne kunstenaer veur te drage oét naam van alle viéf de stadsdeilvereiniginge.

Veur Van der Beele waas 't 'n groëte verassing det de vors van de Keieschiéters um vroog. "Ik vind 't hartstikke leuk um veur alle vastelaovesvierders in de gemeinte Venlo d’n Opstaeker te meuge ontwerpe. Ik môt iërlik zegge det ik eigelik neet good wis waat d’n Opstaeker noow eigenlik waas. Maar 't idee det ’t veur de vastelaovesvereiniginge oét alle kerne van de gemeinte Venlo 'n steuntje in de rök is, sprik mich erg aan", zaet Van der Beele. "In totaal heb ik viéf ontwerpe gemak".

Oétintelik hebbe Jocus, de Wortelepin, d’n Oeles, de Belhamels en de Keieschiéters gekaoze veur ein ontwerp. ’t Zien twië wölk mit 'n buuëtje mit vastelaovesfigure det onder 'n sterrehemel op 'n rivier vaart. "Mit vastelaovend löpse mit diene kiëbes in de wölk en 't buuëtje op de Maas guf de verbondenheid aan mit de andere vastelaovendvierders in de gemeinte Venlo. De sterre zien 'n verwiezing nao ein van de moëiste vastelaovesleedjes oëits gemak; "As de sterre dao baove straole" alzoë de Arcense kunstenaer.

D'n Opstaeker is 'n soort broche dae steit veur 'n dreejtal zake: 'n bliek van waardering veur de vuule vreejwilligers die allerlei vastelaovesaktiviteite organisere in Venlo, Bliërick, Tegele, Belvend, Arcen en Velde; 'n bliek van betrokkeheid beej de vastelaovend en 'n financiële opstaeker veur de vastelaovesvereiniginge.

De viéf stadsdeilvereiniginge van de gemeinte Venlo haope det de inwoëners, net als veurgaonde jaore, weer massaal dees vastelaovesbroche zulle kaupe um daomei de vastelaovesaktiviteiten van de diverse vereinige te ondersteune.

Alle vastelaovesgezelschappe doon mei aan de verkoup van d’n Opstaeker. Veur de Törvers wuurt dae verkoch beej Readshop Benders.

2013
Opstaeker 2013