Steur de webmeister een mailtje
Loeëte te koup veur de BBB loeëterie
Gelökkig
Niejaor !!
Kunsschilder en illustrator Leon Peeters haet veur de kómmende vastelaovend ‘D’n Opstaeker 2014’ óntworpe. Names Jocus had veurzitter Harry Pouwels dit jaor de ier um eine kunstenaer veur te drage oet naam van alle vief de stadsdeilvereiniginge. Peeters reageerde metein enthousias. “Ik had heej gaar neet op geraekend. Ik vind ‘t erg leuk det me mich haet gevraog um ’t óntwerp te bedinke”, zaet Peeters.  “Ik bin d’r einen daag veur gaon zitte en eigelik had ik al vlot ein zestal schetse klaor.”
Jocus, de Wortelepin, d’n Oeles, de Belhamels en de Keieschiéters ware einsgezind euver ’t definitieve óntwerp, ein dansmarietje. “Ik waas aan ’t zeuke nao iets waat ós bind as ’t um vastelaovend geit. Iddere vereiniging in Venlo haet ein aantal dansmarietjes beej ’t gezelschap. Dus woel ik dit oetbeelde in ’t óntwerp”, zaet Peeters. “De vief vingers aan zien hand, in vastelaovesgroet, beelde de vief stadsdeile van Venlo oet. Ouk de Maas is einen bindende factor, daorum de golve”.
"D’n Opstaeker" is ein soort broche die steit veur ein dreejtal zake; ein bliek van waardering veur de vule vreejwilligers die allerlei vastelaovesactiviteite organisere in Stadsdeile Venlo, Blierick, Tegele, Belfeld en Aarce en Velde; ein bliek van betrokkeheid met de ‘vastelaovend’ en eine financiële opstaeker veur alle carnavalsvereiniginge  in  de regio. De vief stadsdeilvereiniginge van de gemeinte Venlo haope det de inwoeëners, net as vurrig jaor, weer massaal dees  vastelaovesbroche zulle koupe um daomei de vastelaovesactiviteite van de diverse vereiniginge te óndersteune.
Leon Peeters is op 30 juni 1965 in Venlo gebaore. “Ik heb altied vuuel geteikend maar ik heb noeët ein opleiding gevolg. Ik bin ech autodidact”. Nao zien middelbare schoeël die hae afsloot met ein diploma atheneum, is Peeters gaon werke. Aaf en toe schilderde hae waal ens iets veur vrinde en door mónd tot mónd reclame woord ’t alsmaar mier. Op ein bepaold moment meus hae keze tösse zienen baas of veur zichzelf beginne. “Ik bin noow 17 jaor professioneel kunsschilder en illustrator. Ik maak moor- en plefónschilderinge, schilderieë en portrette en ik decoreer.” Bezeukers van horecagelaegehede in Venlo en umgaeving kinne dök werk van Peeters taege kómme. “In vuuel kefees  heb ik moorschilderinge gemak.” Vuuel minse zulle Peeters kinne van zien Jocus Vastelaovesposters en zien illustrasies in de Träöt, ’t staatsorgaan van Jocus. “Zes jaor geleje vroog Piet Camps, dé Venlose illustrator, aan  mich of ik zien taak binne Jocus  lanksaam woel gaon euver neme. Dao bin ik erg gruuets op. Ik probeer te werke in zien traditie, maar met miene stiel.”

(brón: Jocus Venlo)
2014
Opstaeker 2014