Steur de webmeister een mailtje
Loeëte te koup veur de BBB loeëterie
Gelökkig
Niejaor !!
Beeldend kunstenaer Jan Lucker haet veur de kómmende vastelaovend ‘d'n Opstaeker 2016' óntworpe. Names d'n Oeles had Vors Gé Cornet dit jaor de ier um eine kunstenaer veur te drage oet naam van alle vief de stadsdeilvereiniginge. Lucker waas metein enthousias. "Ik vind 't erg leuk det ik d'n twelfde Opstaeker heb meuge óntwerpe", zaet Lucker. "Nao ein tiedje brainstorme heb ik vief schetse gemak."

Oetintelik hebbe de vorste van Jocus, de Wortelepin, D'n Oeles, de Belhamels en de Keieschiéters ein winnend óntwerp gekaoze. ‘D'n Opstaeker' is ein saort broche det steit veur ein dreejtal zake: ein bliek van waardering veur de vuuele vreejwilligers die allerhande  carnavalsactiviteite organisere in de stadsdeile Venlo, Blierick, Tegele, Belvend en Arcen en Velde; ein bliek van betrokkeheid beej de vastelaovend en eine financiële opstaeker veur alle carnavalsvereiniginge in deze regio. De vief stadsdeilvereiniginge van de gemeinte Venlo haope det de inwoeëners, net as vurrig jaor, weer massaal dees vastelaovesbroche zulle koupe um zoeë de verschillende  vastelaovesactiviteite van de diverse vereiniginge te óndersteune.

Jan Lucker is op 29 jannewari 1940 gebaore in Tegele. Hae studeerde aan de Academie voor Beeldende Vormgeving in Eindhove wao hae in 1963 aafstudeerde. Daoveur had hae al ein opleiding tot pottebakke en beeldhouwe gevolg. "In Eindhove koos ik textiel umdet det de meis vreje vorm waas. Qua creativiteit ware d'r nauweliks belemmeringe." Lucker haet zich veural beziggehalde met 't óntwerpe van stóf en drökpetroeëne.

D'n Tegelse beeldend kunstenaer is trouwes neet zien ganse laeve actief gewaes in de kuns. "In 1964 is mien vader euverleje en toen stónd ik veur de taak um zien restaurant aan de Remundsewaeg euver te neme. In 1976 haet mien broor de zaak  euver genaome."  Taegeswaordig is Lucker veural te vinde in zien atelier aan de Parkstraot op Steyl, wao hae veural bezig is met keramiek. Daobeej gif hae cursusse veur ‘t Keramisch Atelier de Tiendschuur in Tegele. Lucker haet met vastelaovend veural achter de bar gestaon. Hae vind 't ein  fees wao enorm vuuel creativiteit tot uting kump. "Asse de vastelaovend van de ziekant bekieks, vruuegs se dich aaf wao die creativiteit allemaol vanaaf kump."

(Brón: Jocus)
2016
Opstaeker 2016