Steur de webmeister een mailtje
Loeëte te koup veur de BBB loeëterie
Gelökkig
Niejaor !!
Kunsschilderes Marijke Cruysberg-Meulendijks is de ôntwerpster van “d’n Opstaeker 2017”. De Belhamels oét Belfeld hadde de iër um eine kunstenaer veur te drage oét naam van alle viéf de stadsvereiniginge. Mevrouw Cruysberg reageerde aangenaam verras. “Toen ik gevraog woord um d’n Opstaeker te meuge ôntwerpe, ginge d’r geliék allerlei raedjes dreie in miene kop”, zag Marijke Cruysberg. “Ik môt dan geliék ein aantal schetse make, anders is ’t ideej weg. In twië waeke heb ik zeve ôntwerpe gemak.”

Oétintelik haet de jury, die besteit oét ein aafvaardiging van Jocus, de Wortelepin, D’n Oeles, de Belhamels en de Keieschiéters, éín winnend ôntwerp gekaoze, ein gezich mit bellônne op de kop, waobeej de bellônne massief zien en ’t gezich aope zoëdet dao de kleure van ‘t “vastelaovespekske” te zeen zien van de persoën dae um druuëg.

“D’n Opstaeker” is ein saort broche det steit veur ein dreejtal zake: ein bliék van waardering veur de vuuële vreejwilligers die allerlei carnavalsactiviteite organisere in de stadsdeile Venlo, Blierick, Tegele, Belfeld en Arcen en Velde; ein bliék van betrokkeheid mit de Vastelaovend en eine financiële opstaeker veur alle carnavalsvereiniginge in deze regio. De viéf stadsdeilvereiniginge van de gemeinte Venlo haope det de inwoëners, net as veurig jaor, weer massaal deze vastelaovesbroche zulle koupe um zoë de verschillende vastelaovesactiviteite van de diverse vereiniginge te ôndersteune.

Marijke Cruysberg-Meulendijks is op 23 mei 1942 gebaore in Helmond. Zien mooder en ziene man zien van Tegelse kômaaf. Zeej haet 28 jaor in Tegele gewoënd en woënt noow alweer 23 jaor in Belfeld. “Ik wis altiéd al det ik kôs teikene. Op de liëgere schoël had ik ein juffrouw die det stimuleerde. Maar vaerder as de Vrije Academie in Helmond bin ik neet gekômme. D’r woord gewerk, getrouwd en veur de kinder gezörg”. As de kinder wat groëter zien besluut zeej eine cursus te volge beej Gijs Trepels en later Sef Moonen. “Dae letste stimuleerde mich um te gaon starte op de Academie voor Beeldende Kunst in Maastricht”. Marijke Cruysberg ging viéf jaor lang veer aovende per waek mit d’n trein nao Mestreech um oétintelik aaf te studere. “Maar toen kwaam ik d’r achter det neet idderein op ein schilderie zoot te wachte. Ik besloot um les te gaon gaeve in mien eige ateier, Teiken en Schilderatelier Marijke Cruysberg.”

Marijke Cruysberg haet tot zien 15e noeit Carnaval gevierd. D’r waas niks in Helmond. “Toen weej nao Bakel zien verhoés haet mien vader dao ein carnavalsvereiniging opgerich”. En naodet ze in Limburg is kômme woëne, haet ze same mit eure man altiéd genaote van de “vastelaovend”. Ik heb oeit nog eine carnavalswage ôntworpe veur de groep “Slum kiéke”. Carnaval is ein kakafonie van kleure, heerlik”, aldus Marijke Cruysberg.

(Brón: Jocus)
2017
Opstaeker 2017