Vors Törvius

Stephan Peeters (Pieëters op zien Venloos) is miene naam.

In 2014 meuge binne traeje as Hoeëgheid van VG De Törvers. Sinds september 2017 maak ik deil oet van ‘t bestuur van VG De Törvers. In ‘t bestuur zeen ik mien oetdaging um De Törvers te laote vernieje, verjongere, maar zeker de tradities te behalde die door de jaore door de minse van de Törvers zien opgebouwd en die de Törvers de Törvers make. As Vors Törvius zeen ik dan ouk mien taak um deze schoeën opgebouwde tradities op ein zoeë passend meugelike wies nao boete oet te drage.

Vastelaovend is veur mich, det iddere mins tiedes de Vastelaovend geliek is aanein, waat of wae se ouk bis. Jónk of ald, erm of riek ‘t mak neet oet. We meuge tiedes de Vastelaoves daag zien wae weej wille zien. Det mak veur mich de Vastelaovend zoeë uniek. Vastelaovend is ein cultureel erfgood det weej good mótte bewake en verzörge, en idder jaor weer vol op van mótte genete. Maar waat nog belangrieker is, um ‘t geveul det beej de Vastelaovend huurt op de juuste wies door te gaeve aan ós nie generasie.

As se kieks nao De Törvers dan zuus se ein gezelschap wao idderein geliek is aan ein en wao idder jaor weer same keihard gepees wuurt um d’r weer ein geweldig, kwant en toef Vastelaoves seizoen van te make. VG De Törvers is ein gezelschap det veur mekaar klaor steit, zoeëwaal in goje as slechte tieje. Ik bin dan ouk gruuets det ik deil meug oetmake van dit geweldige gezelschap.

Chef De Protocol

Rob Aerts

De Chef de Protocol druueg zörg veur de handhaving van ‘t protocol tiedes zittinge en resepsies.

Hae druueg zörg veur de begeleiding van ‘t Trio beej optraejes boeteshoes en beej eige interne aktiviteite.

Hae is de rechterhand van Vors Törvius en verrich in opdrach van de Vors allerlei hand- en spandeenste. Ouk regelt hae, in samenwerking met de joekskemissie, zake die betrekking hebbe op optraejes van artieste tiedes de zittinge. 

Hae deent op de huuegte te zien van programma’s tiedens eige zittinge. Veur de zittinge guuef de Chef de Protocol dao toe Vors Törvius en ouk de Sirremoniemeister ‘t dreibook.

Sirremoniemeister

Hans Aerts

As Sirremoniemeister volg ik ‘bevaele’ van Vors Törvius op en veur ze oet. Daobeej bin ik verantwoordelik veur ‘t ophaole en wegbringe van de artieste tiedes ós zittinge. Ouk verzörg ik ‘t aanmelde beej externe optraejes (resepsies) middels de  aanmeldingskaarte. ‘t Tiedig vertrekke van ‘t gezelschap beej externe optraejes regel ik in euverleg met Vors Törvius. 

Vanzelfspraekend bin ik op de huuegte van de winse waat betref de meziek beej binnekóms van ‘t Dreejspan, artieste en andere tiedes de zittinge. 

Raodsleje

De res van de raod besteit per aktiviteit oet leje van de vereiniging. Idder lid meug zich aanmelde um 7 aktiviteite as raodslid mei te gaon, um alzoé Dreejspan van desbetreffend jaor te vergezelle nao ós zustervereiniginge, zittinge of andere bezeuke.