Einmaolige Törvers ónderscheiding

De Törvers perbere midde in de samelaeving te staon en wille gaer aan jónk en ald de gelaegeheid baeje um same joeks en jen te make. Zeej vinde eine gooje gemeinschapsband zier belangriek en wille dao dan ouk gaer eur steinke een beejdrage, in ut bizónder rónd de Vastelaovestied. 't Meug veur zich spraeke det d’r vuuel mier persoeëne, vereiniginge en instansies zien die d’r vuuel aan gelaege is ouk inhald te gaeve aan dae gemeinschapsband. D’n eine kier gebeurt det door naodrökkelik op de veurgrónd te traeje, d’n andere kier gebeurt det in stilte achter de scherme. Idder duit det zoeë op zien eige wies.

Met 't oetreike van de Einmaolige Ónderscheiding wille De Törvers met innige regelmaot de schienwerpers ens richte op dees bouwers aan gemeinschapszin. Van belang daobeej is det de persoeën, de vereiniging of instansie dae genomineerd wuurt zich gehiel belangeloos inzet veur de gemeinschap wao weej same deil van oet make. Ouk kint ut zoeë zien det de óntvanger van de Einmaolige Ónderscheiding in ós wiek zienen thoes haet, maar good werk verrich veur minse wiedeweg. De aafgeloupe jaore zien zoeë hiel waat harde werkers mit 't hert op de juuste plaats in 't zunke gezatte.

Einmaolige Ónderscheiding veur Gé Deenen

“Zinge……mien laeves vitamine”

Sinds 1980 zink Gé. Hae is ein gaer gezene arties op iddere Vastelaoves buun. Hae duit ’t allemaol met vuuel plezeer en euvertuging. Hae kump oet de Heilig Hart parochie wao hae mier as 50 jaor haet gewoeënd. Zien ierste buun optraeje haet hae staan beej Jeugklup Heilig Hart. Tiedes de zitting aafgeloupe jaor, haet Gé Deenen de einmaolige ónderscheiding óntvange veur al zien deenste op Törvers buun. Gé zaet daovan ’t volgende: waat zien die 44 jaor op de buun umgevlaoge en waat heb ik daovan genaote. Ik zoel d’r ein book van kinne schrieve….aevel zoel det ein hiel diek book gaon waere. De allerierste leedjesaovend in de “Prins” op de Kaldenkerkerwaeg waas “klatergold en parelwien”.

’t Zinge van Vastelaovesleedjes haet mich vanaaf toen noeëts mier los gelaote. Mien ierste vrouwelike zangeres wao ik mei gezónge heb, waas Joke Theeuwen. Met um zóng ik nog op de Jocus LP van 1984. Ik weit neet wae d’r gruuetser waas mien moder of ik zelf.

’t Schoeënste veur mich waas waal de ierste kier det ik de veerde plaats op de leedjesaovend wón in 1992. Same met Hay Crompvoets wón ik “door diek en dun” en jaowaal, dit leedje had ik zelf geschreve! Det waas veur mich neteurlik döbbel bizónder. Nao det ierste jaor met Hay bin ik gans in ein Vastelaovesbad terech gekómme en heej geneet ik nog steeds van. Ik bin alle schrievers die veur mich geschreve hebbe altied dankbaar gewaes det zeej aan mich hebbe gedach al die jaore. Det heb ik zier gewaardeerd. Van Giel Aerts wies Frans Boermans, van Jan Jacobs wies Jan Bax en van Hannelore wies Wim Roeffen en Marcel Driessen.

In Venlo heb ik ’t gelök gehad um met vuuel nummers de prieze in te zinge met wisselende zangers en zangeresse. Ik geneet dao nog steeds van. Veural as ik merk det al die leedjes die ik moch zinge nog steeds meigezónge waere. En “aohjei” as ik beejveurbeeld “Josefien” vergaet. Det is ein nummer det meug en kan ik neet vergaete te bringe. Det sukses op ’t LVK same met Wiel in 2000 zal mich ouk altied beej blieve. Lets aan vroog emes waat ik zelf van alle gezónge leedjes ’t beste vónd.

Ik heb waal eine top 5! “Josefien” same met Wiel is nog steeds ’t suksesvolste. “nog efkes same” met Petra Houben ’t allerschoeënste. “’t Jeske van ’t jaor” en “moeëjste maedje van de waereld” met mien broor Rob, umdet weej dao erg gruuets op ware um deze as breurs same te winne. En “kinne weej zinge” umdet dit waal ’t meis hilarische waas van al de leedjes die ik gezónge heb.

De jaore met de Kammeräödjes zien ónvergaetelike jaore. Weej brachte same de Venlose leedjes door gans Limburg. In drökke tieje van Lottum nao Valkenburg en op de truukwaeg nog örges in Venlo en det op eine aovend. Noow zing ik nog aaf en toe gezellig met Petra, mien broor Rob, May Anröchte of met Ingrid Janssen. Ik woel gen verplichtinge mier. En dét doon waat ik zelf aan kan en leuk vind. Zoelang ’t leuk is um beej zörginstellinge, kinder, fiedel zaoterdaag in Domani of beejveurbeeld op de Kwartelemert beej kefee D’n Blauwe te zinge, zal ik det doon.

Ik blief zegge “de minse die neet mier nao de Vastelaovend kinne gaon, die mós se de Vastelaovend gaon bringe”. En al bin ik aan ’t aafbouwe, veur dees minse blief ik ’t doon zoeë lang ’t geit. Al die schoeëne momente zitte veur altied in ’t Vastelaovesbook van mien hert. Ik heb ik al die jaore vuuel dankbaarheid ervare. En det zal ik noeëts vergaete. Bedank veur ógge lach, óg meizinge en óg applaus. Vastelaovend blieve weej same viere. Minse plezeer bringe, det brink mich gelök.

Met vrintelike groetjes,

Gé

Gé kreeg de ónderscheiding oetgereik op ós groeëte Zitting van 2024

Moch me 't lieske d’r ens op nao slaon aan wae door d’n tied haer de Einmaolige Ónderscheiding is oetgereik, dan zuut me ein aafwisselend gezelschap de revue passere. Waat zeej mit mekaar deile is ut gegaeve det zeej 't hert allemaol op de goje plaats hebbe zitte. Vanoet det werm kloppend hert besteit of bestónd beej eur allemaol de bereidheid um de hand oet de mouwe te staeke en iets euver te hebbe veur d’n ander. Weej zien d’r van euvertuug det ouk de kómmende jaore dees schoeën ónderscheiding ziene waeg nog zal vinde. Daomei spraeke De Törvers de wins oet det de verbóndeheid die met Vastelaovend dök zoeë veulbaar en tasbaar aanwezig is, zich ouk door 't jaor haer meug manifestere in allerlei te waardere initiatieve!

1974 Dhr. P. Langeslag vanwaege de verdeenste binne de perochie
1975 Mw. G. Exterkate vanwaege inzet beej de Stg. De Zónnebloom
1976 Dhr. J. Lambrechts vanwaege de verdeenste beej ut H.Hartkoeër
1977 Mw G. van Rens vanwaege verdeenste as bestuurslid beej Stg. De Windmeule
1978 Dhr. G. Exterkate vanwaege de verdeenste binne de perochie
1979 Dhr. F. Thissen vanwaege de verdeenste binne de perochie
1980 Mw. M. Vernooy vanwaege inzet beej de bejaardesoos
1981 Dhr. H. Ebus vanwaege inzet Scouting Baden Powell
1982 MwDhr J. Nieuwenhuis vanwaege inzet beej de Stg. De Zónnebloom en Beledoko
1983 Dhr. J. Driessen vanwaege de verdeenste as organis van de H. Hartkerk.
1984 Dhr. B. Kok vanwaege zien verdeenste as kerkmeister en penningmeister Stg. De Windmeule
1985 Dhr. M. Scherjon jeugdkoeër Canta Libre en jóngerekoeër H.Hartperochie
1986 Mw. D. Cnoops vanwaege de inzet beej de bejaardesoos
1987 Dhr. E. Haenen vanwaege d'n inzet as köster van de H.Hartperochie
1988 Dhr. T. Goossens vanwaege zien inzet veur ut missiewerk H. Hartperochie
1989 Dhr. L. Janssen vanwaege inzet ashölpköster en zangkoeër
1990 Dhr. J. Lukasik vanwaege inzameling van kleiding voor Polen
1991 Dhr. J. Langeslag vanwaege ut vuuële vrijwilligerswerk binne de perochie
1994 Dhr. J. Quadvlieg vanwaege ziene inzet as dirigent van ut H. Hartkoeër
1995 Dhr. J. Biesmans vanwaege zien inzet as bestuurslid beej Fortissimo
1996 Stichting De Windmeule vanwaege de verdeenste veur de gemeinschap
1997 Zuster Rosanette vanwaege verdeenste veur Stichting Emmaus
1998 Dhr. Mensink vanwaege verdeenste binne de perochie en ut Aldere Platvorm
1999 Jeugd- en Jongerenkoor H. Hart vanwaege eur verdeenste binne de perochie
2000 Dhr. G. van Beek as prissentator Festinament, Roeëje Kruutszitting en optraejes tiedes zittingen
2001 Scouting Baden Powell vanwaege de verdeenste veur de jeug in de perochie
2002 Dhr. H. en mevr. M. van de Ham vreewillig optraeje tiedes de Vastelaovend
2005 Showorkest Fortissimo vanwaege eur 50 jäörig bestaon
2007 Dhr. Frans v.d. Bercken zien verdeenste veur ut "Gambia projek"
2009 Pater Henry Peeters Vanwaege zien verdeenst beej ut missie werk in west Kameroen
2010 Sticht. Zonnebloem Venlo-noord vanwaege eur werk veur de medemins
2024 Dhr. Gé Deenen vanwaege zien beejdrage in 't Venlose