Nieje Törvers ónderscheiding
Op veurdrach van de leje hebbe weej eine nieje Törvers ónderscheiding in 't laeve gerope. Te weite Ambassadeur van VG De Törvers. Heejbeej kinne weej eine persoeën dae de Vastelaovend in 't algemein en in de Heilig Hart in 't bizónder ein werm hert toedruueg.
Heejmei wille weej as Törvers ónderschrieve det de Vastelaovend same gevierd wuurt en det weej de georganiseerde Vastelaovend in de Heilig Hart geweldig as bizónder blieve vinde.
Ambassadeur Geert Benders
Tiedes de Benders Boetezitting van 2024 hebbe De Törvers, Geert Benders beneump as ambassadeur.
Ein gesprek met Geert Benders levert altied ein laevendige óntmoeting op, aope, dudelik en ierlik, kump altied oet veur zien meining. Hae is gruuets op zien ambassadeurschap. Zien betrokkeheid waas d’r al in de winkel op de Straelsewaeg wao zien elders in 1956 zien begós. Ein gedeilte loog eigelik in ’t centrum en ’t andere gedeilte in ’t Heilig Hart. Aevel altied is de femielie Benders betrokke in ós wiek. Zeker wie Geert in 1986 de winkel euvernoom en d’r in 1994 eine nieje winkel kwaam op ’t Gelre plein.
’t Meug dudelik zien det de verbindinge met de wiek nog baeter tot zien rech kwame en det d’r verschillende aktiviteite gezamelik gedeild woorte.
Wie Geert in 2004 Prins waas van Jocus woort d’r spontaan ein fees georganiseerd op ’t Gelreplein. Dit waas d’n oorspróng van de taegewaordig beej ós bekinde Benders Bizóndere Boetezitting. De Törvers zien veur Geert ein groeët veurbeeld wie ein zoeëgeneumde wiekvereiniging mót zien, veur de wiek ónmisbaar in ein stad as Venlo. Geert zaet ’t zoeë: “ein gezelschap waat d’r steit, noeëts opvelt, aevel door waat zeej doon sterk zien en zoeë ein prominente plek hebbe verworve in de Venlose Vastelaovend”.
Vastelaovend en de toekóms zien veur Geert ouk dudelik. Meziek haet ’t de letste jaore euvergenaome en det is good, aevel waal jaomer det d’r haos gen of weinig buuttereedners en parodie mier is want dao zit ouk en groeët stök van de geis van Vastelaovend in; zake op de hak neme. Dao zit misschien waal ein oetdaging veur de wiekvereiniginge um dao ens aandach aan te bestaeje zoeëdet die persoeëne en groepe ein kans kriege en Venlo weer eine kómplete Vastelaovend wuurt.
Geert geit langzaamaan waat minder doon en ’t zuut d’r nao oet det dit misschien kómmend jaor al geit lökke.
Dochter Niki en schoeënzoon Leo, óndersteund door Robin, staon klaor um de zaak euver te neme en weej merke det zeej in daezelfde geis as Geert, ós gezelschap blieve steune. Zoeë kump Geert as ambassadeur gans tot zien rech.
Geert van herte proficiat en weej haope dich nog dök te zeen op ós aktiviteite.
Geert Benders krieg de ónderscheiding oetgereik op de Benders Bizóndere Boetezitting
Ambassadeur Geer Camps
Geer Camps is op ós Groeëte zitting van 2024 beneump tot ambassadeur. Wae kint Geer neet, Lid van de Törvers sinds 1983, Prins gewaes in 1986, de scepter maker en sirremoniemeister-stekke maker. Veur iddere vereiniging, jeug- of wiek en boerebroelof gezelschappe die beej um aankloppe zulle dao genne spiet van hebbe gehad. Beej Jocus ge-ierd. Geer neemp altied ’t Törvers gezelschap mei in ’t euverhandige van dees prach exemplare. As se Geer vruuegs wie weej d’r euver elf jaor beej staon, guuef hae aan det de Törvers d’r nog altied zien op de meneer wie ein wiekvereiniging huurt te zien. ’t Ambassadeurschap vind hae ein schoeën waardering aevel wit hae nog neet gans waat det beteikent, “det mótte zeej mich maar eine kier oetlegge”.
Same met zien Prinses Nelly haet Geer de speld meuge óntvange van Prins Leon I.
Geer proficiat
