Fiets Kemissie - Wao fietse weej dit jaor haer ?
‘t Begós allemaol begin jaore tachtig. Inkele dames van De Törvers organiseerde ein fietstoch veur de dames. Twieë leje dachte: ‘Verrek, waat ein good idee. Weej pakke ‘t waat groeëter aan en weej richte ein fietskemissie op!’ In 1982 zoog dees kemissie ‘t leech. Martin van Gerven en Peter Broks richde de fietskemissie op. As doelstelling hadde zeej in dees begin jaore ein lekkere rustieke fietstoch in de umgaeving van Venlo te laote plaatsvinde, met ónderwaeg ein lieske met vraoge euver van alles en nog waat.
‘t Waas ein schitterende meneer um De Törvers en Törverinnekes midde in ‘t jaor toch nog ens te zeen op ein informele wies. Zoeë woort d’r euveral nao toe gefiets. In de beginperiode woort d’r in ut naojaor gefiets. Later verschoof dit nao ut veurjaor. Dan waas ‘t meistal moeëj weer. Meistal… Det weej ónder ‘t fietse behuurlik naat en of flink druueg geblaoze kóste waere, hebbe weej de aafgeloupe jaore waal gemerk. Maar weej as echte Törvers en Törverinnekes zien neet bang veur waat wind of water.
Op ein gegaeve ougenblik woort Peter Broks opgevolg door André Hendrix. Ónder leiding van Martin en André hebbe weej weer vuuel kilomaeters aafgefiets. ‘t Animo veur dees tochte woort met ‘t jaor groeëter. Begóste weej nog met ein klein aantal van ongevier 20, de letste jaore hebbe weej al met mier as 55 persoeëne gefiets! Zó’nne daag is altied keigezellig met de ganse Törvers-femielie.
Al met al kinne weej zegge det weej altied met vuuel zörg de fietstochte oetzette en organisere. Ónderwaeges wuurt d’r altied gezörg veur bruuedjes en fris. Aaf en toe hebbe weej as kemissie nog waat in de kas zitte um onderwaeg ein rundje te kinne gaeve. Det wuurt altied hertelik in óntvangs genaome.
Met vuuel lol en plezeer organisere weej idder jaor weer de fietstoch!
