Hoeëgheid Anna Derix I
YES, ik meug t intelik vertelle!
Dit jaor meug ik, Anna d’n ierste, de Vastelaovend veurgaon as hoeëgheid van de Törfkes met mien twieë fantastische Adjudante Pien en Myrthe. Gaer wil ik mich zelf daorum aan óg veurstelle:
Ik bin Anna Derix, 15 jaor jónk en woeën in ’t schoeëne Blierick. Heej woeën ik met mien pap, mam en mien aldere broor Daan.
In miene vreje tied gaon ik gaer shoppe en gaef ik bakke met geld oet aan leuke kleier. Det geld mót neteurlik ouk verdeend waere en det doon ik aan Mooder Maas, beej de leukste tent van Blierick, Sur Meuse! Heej doon ik van alles same met mien geweldige collega’s, maar ‘t leukste vind ik toch waal in de bedening staon, zoeëdet ik ein präötje kin make met de gaste en eur kin veurzeen van ein hepke en ein drenkske.
Op zaoterdage bin ik op 't kunsgraas van Hockeyclub Delta te vinde, wao ik rechsachter speul in de MO16-2. Tiedes wedstriede en traininge geit 't d’r serieus aan toe, maar daonao make weej as team eine houp lol en plezeer!
Tiedes vakanties hald ik van uterste, of lekker werm in ‘t zunke aan 't zwumbad, of sportief bezig op de skies in de kalde snieë.
Uteraard meuge mien vrinde en vrindinne neet ontbraeke, wao ik vuuel lol mei heb en meinige eurkes mei doorbring. Same met eur en óg kiek ik d’r nao oet um de Vastelaovend van 2025 in ‘t Törversriek ónvergaetelik te gaon make!
Adjudant 1 Pien Ketelings
Dit jaor meug ik als Adjudant 1 van de Hoeëgheid, same met óg eine gezellige Vastelaovend gaon viere. Daorum wil ik mich gaer efkes veurstelle aan óg.
Miene naam is Pien Ketelings, ik bin 16 jaor ald en woeën dan ouk al 16 jaor in ´t schoeëne Venlo. Ik woeën same met mien elders genaamd Tom en Gidian, ein aldere broor Rens en zuske Gite. Ik zit noow in mien examejaor van VMBO gemingd theoretisch. In miene vrejen tied doon ik gaer handballe beej Fortes Venlo. Heej bin ik dan ouk dök te vinde.
Vaerder kom ik oet ein ech Vastelaoves gezin, daorum hoofde ik d’r neet lang euver nao te dinke, wie ik door de Hoeëgheid gevraog woort um ein van zien Adjes te waere.
Ik kiek d’r dan ouk erg nao oet, um same met óg Vastelaovend te gaon viere.
Adjudant 2 Myrthe Peeters
Ik bin Myrthe Peeters en dit Jaor adjudant 2 van Hoeëgheid Anna.
Al mien ganse laeve woeën ik in ‘t Wortelepinne riek met mien elders. Ik doon noow de opleiding Apothekersassistente aan ‘t Gilde College Venlo. En in ‘t waekind werk ik in de Horeca beej Maashof, en laot ik de minse gaer genete van ein hepke en ein drenkske.
In miene vrejen tied speul ik Hockey beej HC Delta Venlo, dao speulde ik same met de Hoeëgheid in ein team. De Vastelaovend heb ik vanaaf mien jeug al meigekrege. Mien Elders ware dao altied erg fanatiek in. En miene pap is ouk adjudant 2 gewaes, dus ik neem noow zien plekske euver. Beej ós thoes steit ‘t ganse jaor de Vastelaoves meziek op.
Gaer reis ik de ganse wereld euver, net wie veurig jaor nao Tanzania, maar mien favoriete vakantie land in Europa is Italië. ‘t Heerlike aete, de schoeëne taal en mien Familie.
Same joetse doon weej gaer, de stad in of lekker ein terrasje pakke met ós vrindinne. In de zomer zit ik vuuel in ‘t water met eine Snorkel, of op ‘t water met ein surfplank. In de winter ruil ik mien surfboard in veur ein snowboard um lekker de berg aaf te vlege.
